antecedentes   | donde y cuando  | documentos  | actual  | contacto   | > portal  

¡ÑUKANCHIK KAPARI UYASHKAMI KANKA!


 

CONVOCATORIA: Campamento Internacional Permanente por la Justicia Social y Dignidad de los Pueblos




 
Kuyashka warmi, kari mashikuna:
 
Quito llaktamanta, Ecuador mamallaktamanta tukuykunata shunkukumanta napanchik, shinallatak Campamento Internacional Permanente por la Justicia Social y Dignidad de los Pueblos tantanakuyman kayanchik. Kay tantanakuyka tukuy sapalla runakuna, tantanakuykunapash tantarishpa imashina tawka runakunata, tawka llaktakunata shukkunaka llapishpa, wañuchishpa kawsakta yuyarinkapakmi kan. Imashina shukkuna charitukushpa, ñukanchikta wakchayachishkamanta, ñukanchik kawsaykunata chinkachishkamanta, Plan Colombia shutiwan wañuchimanta, Area de Libre Comercio de las Américas (ALCA) tukuy laya katuy-rantipilla tukushkamanta kaparinchik.
 
Ama shuk llaktakunalla charitukushpa, shukkunataka wañuy patapi charichun, ama maykan charik runakunalla tantarishpa wakcha llaktakunamanta achka kullki, kapukunatpash llukchichunpash, ñukanchik wakchakunapura tantarishpa sinchiyana kanchik; ashtawankarin, kunan maymanpash kayanalla, rimarinalla jawalla kakpi, ñukanchik yuyayta tukuy llaktakunaman riksichikrinchik.
 
Berlin Llakta Muru urmakpi, ñami wakchakunapak muskuy tukurirka nishpa tawkakuna yuyarkakuna; shinapash mana sina kashkachu, kunanka tukuy pachapi tawka chikan runakuna, chikan tantanakuykunapash rikcharinakunkuna, yuyarinakunkuna shuklla ñanta mashkashpa ñukanchik wakcha kashkata chariyuk llaktakunata juchayachishpa shamuk punchakunapi ashtawan alli kawsayta charinkapak, ñukanchik mushkuyta paktankapakmi yuyankuna.
 
Plan Colombia, Plan de guerra, ALCA ¡ALCArajo!
 
Kunan Colombia llaktapi achka cuca tarpuy-katuy tiyan nishpa Plan Colombia llankay shutichishpa, kay llaktapi yaykushkakuna; shinallata, ñawpa pachakunapipash México, Cuba, Guatemala, Hondura, República Dominicana, Puerto Rico, Haití, El Salvador, Panamá, chile, Colombia, Argentina, Paraguay, Uruguay, Ecuadorpipash... yaykushkakuna. Kay makanakuyka achka makanakuy jillaykunata katushpa achka kullkita Estados Unidos llaktaman japinkapakmi kan.
 
Plan Colombia nik tukushpa, kunanka ñami Kullasuyu Abya Yalaman yaykukunkuna Iniciativa Regional Andina (IRA) nishkawan. Chaipika, wañuy-makanakuy tiyashka jawa, cuca yuyakunata wañuchinkapak nishpa, wañuna jampikunatami wayramanta jichakunkuna, chaika tawka wiwakunata, yurakunata, runakunatapashmi wañuchikun.
 
Estados Unidos ashtawan jatun tukunkapak, tukuy laya Amazoníapi tiyashka kapukunata, wiwa, yurakunata, yaku, yana wira, shuk munashka rumikunatapash japinkapak munan; shinallatak, ama ashtawan wakchapurakuna tantarichun, kaparichunpash nishpami shina llankaykunata rurakunkuna.
 
Ecuador mamallaktapi, Panamapi, Argentinapipash dolarizacionman chayachishkakuna. Shinallatak, kullkita shuk shuwakuna japishkamanta, jatun chariyukkunata mañashpa ashtawan, jucha sapaman, wakchayanaman tikrashkanchik, yachana wasikuna illak, mikuna illak, ashtawankarin, chariyukkunatami wirayachikunchik.
 
Ñukanchik Ecuador llaktapipika, Apuk Jamik Mahuadta 21 enero puncha, 200 watapi, runakuna tantarishpa urmachirkakuna, shinapash Gustavo Noboata apukta churankapakka Bill Clinton yanapak Arturo Valenzuelami allikachishpa churachishka.
 
Noboa apukka, shuk apukkuna shinallatak katin, Fondo Monetario Internacionalta, Banco Mundialta allikachishpa, Kuntishuymanta charikkunawan, Punallaktamanta charikkunawanpash tukushpa, dolarizacionman chayachishkakuna, banko kullkikunata shuwarkakuna, yaku, achika, rimankapak tiyashkakunatapash paykunaman rantinkapak munankuna.
 
200 watapi Ecuador mamallaktaka 91% chanikuna ashtawan jawaman tukurka. 10% ashtawan charikkuna 60% tukuykunapak kullkita charinkuna; shinallatak 10% ashtawan wakchakunaka 0.6% charishkawan kawsankuna. Naka 80% wawakuna, warmikuna, karikunapash mana ima llankayta charinkuna. Banco Mundialka ninmi tukuy Ecuadorpi kawsakkunamanta chawpillami wakchakuna kanchik nin, ñukanchik rikukpika 80% runakunami wakcha kanchik (9 junu runakuna), 3 junuka ña yarkaymanta wañukrinchik. Shinallatak 15% yallitami shuk llaktakunaman llulshishkakuna (España, Estados Unidos llaktakunaman), chaykunami achka kullkita Ecuadorman kachankuna. Chaimi kan Banco Mundial, Fondo Monetario Internacionalpak nishka yuyaykunata rurashpa katishka.
 
Chinchaysuyupi kunanka wañuy makanakuypi kawsanchik, Base de Mantatapash Estados Unidos Grinkunapak makipi Jamil Mahuad churarka Congreso taitakuna mana riksichishpa. Chaimantami, kunanka Plan Colombia makanakuypi satirishkanchik, Estados Unidos munayta rurashpa.
 
AMA ASHTAWAN MAKANAKUY WAÑUNAKUY TIYACHUN: ¡ÑUKANCHIK KAPARI UYASHKA KACHUN!
 
Latinoamerica llaktakunaka paykunapak yuyay kawsaypi umashka, atishka, kunkashka, millashka, mana riksishkami kawsanchik. Charikkunaka alli kawsayman rishun nishpa ñukanchikpurata makanakuchinkuna, chaimnata tukuylla shayarishunchik.
 
Campamento Internacional Permanente por la Justicia Social y Dignidad de los pueblos llankayka tukuykunawan kimirinata munan (sapalla runakunawan, tantanakuykunawanpash) Plan Colombia llankayta, ALCA katuy rantita, shuk mana alli yuyakunatapash chayllapi shayachishunchik. 2002 watapi kutin rikunakunakapak, chaypi ñukancik kapari, ñukanckik mana munashka yuyaykunata chinpapurachinkapak, shinallatak kay nishkakunamanta ashtawan sinchi shayarinkapak. Kay tantanakuyka mana kunanllachu kan, kay yuyay, kay tantanakuyka wiñay wiñay kawsaykamanmi kan.
 
Wañuy makanakuyta shitashpa, shuk laya kawsay ruranata ushashunmi. Ñukanchik muskuy, ñukanchik kushi kayta ama kunakarishpa, mushuk kawsayta mashkasushunchik.
 
¡ÑUKANCHIK KAPARI UYASHKAMI KANKA.!
 
Julio killapi, 2001 watapi. Quitu llaktapi.
 
 
 
 
 

antecedentes   | donde y cuando  | documentos  |actual  | contacto   |> portal